MAMBO YA KUJIFUNZA KUTOKANA NA UTENDAJI KAZI WA WATU WENYE MAFANIKIO

Jinsi gani watu wanaacha meza zao wanapokwenda nyumbani baada ya kumaliza kazi yaweza ikawa ishara tosha ya kuwaelezea jinsi walivyo. Je, meza zao zinakuwa na makaratasi mengi lakini yaliyopangwa, yenye mipango mipya ya kuhakikisha wanafanikiwa? Kuna picha za familia au matukio yenye kumbukumbu maalumu? Au zinakuwa zimesafishwa vizuri na kupangiliwa?
Mazingira anayofanyia kazi mtu pamoja na ratiba yake katika kuhakikisha anafanya kazi kwa ufanisi akiwa ofisini vinaweza kutusaidia kujua ni kwenye hali gani wanakuwa na matokeo makubwa – na hii itakuvutia zaidi unapoangalia mbinu zinazotumiwa na baadhi ya watu wenye mafanikio makubwa sana duniani:
Hapa tutaangalia tabia za kufanya kazi, ratiba za mara kwa mara pamoja na mpangilio wa meza wa Albert Einstein (alikuwa mgunduzi wa dhana mbalimbali za kisayansi), Arianna Huffington (muanzilishimwenza wa jarida maarufu la The Huffington), Elon Musk (muanzilishi wa kampuni inayotengeneza makombora ya SpaceX na kampuni ya magari ya Tesla), na Mark Zuckerberg (muanzilishi wa mtandao wa kijamii wa Facebook).
Yafuatayo ni baadhi ya mafunzo tunayoweza kuyapata kutokana na kuangalia tabia za watu hawa wakiwa kwenye ofisi zao:
Mark Zuckerberg (mwanzilishi wa mtandao wa Facebook)
Hana ofisi maalumu kwa ajili yake, badala yake anaendelea kufanya kazi kwenye meza iliyopangwa pamoja na wafanyakazi wake wa kampuni ya Facebook.
Funzo: Kama kiongozi mkuu, jinsi unavyoweka maeneo yako ya kufanyia kazi inasaidia kuwaonesha watu wa nje ni mambo yapi ya msingi zaidi kwenye kampuni yako. Mark Zuckerberg anaweka mazingira yake kuwa ya kawaida sana ili aweze kufanya kazi zake kwa umakini mkubwa katika kutatua matatizo yanayojitokeza na dira yake inawaongoza wafanyakazi wote wa Facebook kwani wanajua kwamba hawahitaji ofisi nzuri sana ili kuweza kufanya mambo makubwa duniani.
Elon Musk (mmiliki wa kampuni ya magari ya Tesla)
katika ofisi za Tesla, Elon Musk ameweka meza yake anayofanyia kazi karibu kabisa na sehemu yanapotolewa magari yaliyomaliza kutengenezwa ili aweze kukagua kila gari linatolewa kutoka kiwandani.
Funzo: Unapofanya jambo kubwa sana, ni lazima uwe unakagua kila kitu kuhakikisha kwamba kazi iliyokamilika inakidhi viwango mlivyojiwekea kabla ya huduma au bidhaa hiyo kumfikia mteja. Elon angeweza kabisa kuweka ofisi yake kwenye ghorofa akiwa anaangalia mandhari nzuri sana, lakini kwa kuweka meza yake sehemu anayoweza kuona kila gari lililotengenezwa, anapata uhakika kwamba magari yote yanayokamilika yanakuwa na ubora unaotarajiwa.
Arianna Huffington (muanzilishi wa jarida la Huffington Post)
Kwa yeyote aliyewahi kusoma kitabu chake cha “Sleep Revolution,” ni wazi kabisa kwamba lazima ameona kwamba Arianna Huffington anaamini kwamba watu wengi huwa hawalali kama inavyotakiwa. Kwa sababu hii, anahamasisha watu waweze kupata japo muda mdogo sana wa kulala ofisini ili kuboresha uzalishaji maofisini. Yeye mwenyewe huwa analala ofisini kwake kila akichoka na kuamka akiwa na nguvu mpya ya kufanya kazi.
Funzo: Arianna Huffington ni shuhuda kwamba kama tunaweza kusisitiza wafanyakazi wawe na tabia fulani zinazoweza kuongeza kiwango cha ufanyaji kazi, basi ni bora tuzisimamie kwakuwa ni muhimu katika kuhakikisha mafanikio ya kampuni.
Albert Einstein (mgunduzi wa kisayansi)
Einstein alikuwa aliamini kwamba meza ikiwa na vitu vingi ni ishara ya kwamba mtu ana mambo mengi ya kufanya na kufikiria pia. Kwa sababu hiyo, alikuwa anashangaa ni nini kinachoendelea kwenye akili za watu ambao meza zao maofisini ni safi muda wote!
Einstein alikuwa akifikiria pia kwamba kutumia mawazo yatokanayo na dhana mbili, tatu au zaidi zisizofanana na kutengeneza dhana nyingine kabisa – ndio siri kubwa ya wabunifu wengi duniani.
Funzo: Tafiti zinaonesha kuwa meza za wabunifu wengi sana huwa zinakuwa na vitu vingi juu yake – kitu ambacho Einstein alikihitaji sana kutatua “matatizo ambayo hajawahi kukutana nayo kabla” kwenye fizikia.
Muongozo huu unaonesha kwamba watu wenye mafanikio makubwa sana duniani wameweza kugundua nini cha kufanya ili waweze kuhakikisha kazi wanazofanya zinaleta matokeo mazuri muda wote, kwao binafsi na kwa kampuni nzima vilevile. Ni muhimu hata wewe kujua hili pia…angalia ni nini kikifanyika kitachangia kuleta matokeo mazuri kazini kwako na ufanye hicho siku zote.
JIUNGE NA ZOTEKALI BLOG
Katika FACEBOOK, TWITTER, INSTAGRAM ili kupata habari zetu kirahisi install app ya ZOTEKALI BLOG HAPA
HTML tutorial

Sambaza habari kwa marafiki

Author:

Best Tanzania, Africa and World News Blog, Gossip, Entertainment, Life and Health Tips, Employment and Opportunies,Celebs life and Scandals..... Updated Daily .

Previous Post
Next Post